ប៉ៃលិន៖ បន្ទាប់ពីរាជរដ្ឋាភិបាលប្រកាសបិទបញ្ចប់ព្រឹត្តិការណ៍ថ្ងៃ២០កុម្ភ: ប្រជាកសិករដែលប្រកបរបរដាំដំណាំផ្សេងៗនៅតាមបន្ទាត់ព្រំដែនបានសំដែងក្តីរីករាយនិងសង្ឃឹមថាតម្លៃកសិផលដែលផលិតបាននិងមានតម្លៃខ្ពស់ជាងនេះដូចកាលពីមុនជួបវិបត្តិកូវិដ-១៩។

ប្រជាកសិករដាំចេកពងមាន់រស់នៅភូមិសំបូរ ឃុំសាលាក្រៅ ស្រុកសាលាក្រៅ ខេត្តប៉ៃលិន ឈ្មោះ គង់ កុល ភេទប្រុស អាយុ៧០ឆ្នាំ បានឲ្យដឹងថាគាត់មានចម្ការចេកពងមាន់ជាង១ម៉ឺនគុម្ភ ដាំក្នងផ្ទៃដីជាង៧ហិកតា ចាប់ផ្តើមប្រមូលផលជាងពីរខែហើយ។ បច្ចុប្បន្នលោកប្រមូលផលលក់ឱ្យឈ្មួញបានតែក្នុងតម្លៃប្រមាណតែ១ ៥០០រៀលប៉ុណ្ណោះក្នុងមួយគីឡូដែលស្ទើតែមិនអាចទូទាត់ថ្លៃចំណាយបាននោះទេ។ ទោះជាយ៉ាងណាលោកសង្ឃឹមថាក្រោយការប្រការរបស់ប្រមុខរាជរដ្ឋាភិបាលបិទបញ្ចប់ព្រឹត្តិការណ៍២០កុម្ភៈ និងបើកប្រទេសឡើងវិញលើគ្រប់វិស័យនឹងអាចធ្វើឱ្យតម្លៃផលិតផលចេញអាចកើនតម្លៃឡើងវិញ។

ដូចគ្នាដែរ កសិករម្នាក់ទៀតមានអ្នកស្រី សុវណី អាយុ២៣ឆ្នាំ រស់នៅឃុំសាលាក្រៅដែលមានចម្ការចេកពងមាន់១ម៉ឺនគុម្ភកំពុងប្រមូលផល ក៍បានសំដែងក្តីរីករាយផងដែរក្រោយពីបើកប្រទេសឡើងវិញ អ្នកស្រីសង្ឃឹមថានិងអាចនាំចេញយកទៅលក់នៅក្រៅប្រទេសដូចមុន។

អ្នកស្រីបន្តថា៖ «ប៉ុន្មានថ្ងៃមុននេះឮគេប្រាប់ថាមានក្រុមហ៊ុនបរទេសគេមកចុះសួរដែរតែគេឲ្យកុងត្រាក្នុង១គីឡូក្រាមតម្លៃ១៥បាតស្មើនិង១៨០០រៀលតែក្រុមកសិករមិនព្រមទេបើអត់កុងត្រាបច្ចុប្បន្នលក់បានតែនៅថ្ងៃមុខសង្ឃឹមថាចេកប្រភេទនេះនិងអាចលក់បានទៅដល់ជិត១ម៉ឺនរៀលក្នុងមួយគីឡូក្រាម»។

ពាក់ព័ន្ធទីផ្សារកសិផលនេះប្រធានមន្ទីរពាណិជ្ជកម្មខេត្តប៉ៃលិនលោក សុខ សាធឹម បានឲ្យដឹងថាលោកកំពុងតែសម្របសម្រួលជាមួយភាគីថៃ ដើម្បីឱ្យប្រទេសនេះប្រមូលទិញទិន្នផលដំណាំពីខេត្តបានច្រើនឡើងវិញដែលនឹងធ្វើឱ្យតម្លៃកើនឡើងតាមនោះដែរ។

លោកថា៖ «ដោយកន្លងមកមានការតឹងរឹងដោយសារវិបត្តិកូវិដ-១៩ តែឥឡូវគឺគេអាចទទួលយកកសិផលខ្មែរយើងបានតិចៗវិញហើយ មិនយូរទេកសិផលយើងនិងបាននាំចូលទៅប្រទេសថៃដូចមុនហើយមានតម្លៃថ្លៃថែមទៀត» ។

យោងតាមការឱ្យដឹងពីប្រធានការិយាល័យក្សេត្រសាស្រ្ត ផលិតភាពកសិកម្ម នៃមន្ទីរកសិកម្មរុក្ខា ប្រមាញ់ និងនេសាទខេត្តប៉ៃលិនលោក ផាន សុផាណ្ណារ៉ា បានអោយដឹងថាផ្ទៃដីដំាដំណាំចេកក្នុងខេត្តប៉ៃលិនមានប្រមាណ ៣៨៧ហិកតា ដោយក្នុងនោះមានដំណាំចេកពងមាន់៣៧ហិកតា និងដំណាំចេកណាំវ៉ា៣៥០ហិចតា គិតត្រឹមថ្ងៃកំពុងប្រមូលផលនេះ៕